Cyrmas pogosts

  Cyrmas pogosts izaveidōja pēc 2. pasauļa kara bejušō Zvērgzdines pogosta teritorijā. 1945. godā Zvērgzdines pogostā tyka izveidōti vairōki cīmi, ari Cyrma un  Pokumina.

Cyrmas pogosts atsarūn rajona vokoru daļā, rūbežojās ar Rēzeknes rajona Stoļerovas, Griškānu, Lendžu pogostim, Ludzas rajona Zvērgzdines, Isnaudas, Pureņu pogostim un Ludzas piļsātu, aizjem 8700 ha. Pogosta zīmeļu daļu škārsoj starptautyskōs nūzeimes šoseja Reiga – Jākubpiļs – Rēzekne - Ludza- Terehova - Moskova un Reigas - Moskovas dzeļzceļa linija ar Cyrmas staceju 7 km attōlumā nu centra un 6 km attōlū Ludzas staceju.

Administrativais centrs - Tutyni. Vēļ ir šaidas apdzeivōtas vītas: Antiži, Biži, Cerļeva, Dubinova, Dukani, Dzērkaļi, Edvardoslava, Evertova, Galdyševa, Garbari, Iškina, Justinova, Karpušonki, Kiuļi, Kleperi, Krjakova, Križuti, Lukjanovka, Muļči, Novomisļi, Pabarga, Pļatova, Pokumina, Putinova, Putrinīki, Ramslova, Silinīki, Soidi, Sōrņi, Soroka, Svjataja Gorka, Škincova, Trokši, Vōverova, Zabolotje, Zeļčova.

Cyrmas pogosta lelōkō daļa atsarūn Latgolas augstīnes Rēzeknes pazamynōjumā, viņ zīmeļreitu mola īsasnādz Burzovas paugurainē. Reljefu te veidoj pōrsvorā vidēji un seiki morēnu pauguri. Augstōkais nu tim (175,8 m vjl.) slīnās Pokuminā. Pi pogosta rūbežom atsarūn Bižu un Zvērgzdines azars, bet pogosta teritorijā plešās Ludzas rajonā lelōkais Cyrma azars. Pogosta teritorijā vēļ plešās Dukanu voi Saliņu, Križutu, Runtortas, Pauguļu, Soidu, Gomeļmuižas, Čortovkas azari. Te tak Pabarga un Garbarupe, Pauguļu ryucs. Ap trešdaļu plateibas aizjem meži. Pogostā atsarūn zamais Putinovas pūrs un Peiss voi Muļču pūrs.

Pogostā aug daudzi dižkūki: Gomeļmuižas ūzuls (4,75 m stumbra apleikmārs) un līpas (5,4 m, 4,75 m, 4,30 m), dižūss (4,45 m), gōba Trokšūs (6,15 m), paeglis Zabolotjē (0,5 m), divas vaļsts nūzeimes dižlīpas Cyrmas voi Kalnaču muižas parkā.

Cyrmas pogosta teritorijā bejuse Pokuminas, Križutu, Cyrmas, Tutānu muiža un Gomeļmuiža. Agrarōs reformas laikā muižu zeme pōrsvorā sadaleita jaunsaimnīceibom.

Padūmju varas godūs tagadejō Cyrmas pogosta teritorijā beja kolhozi „Molodaja Gvardija” un „Suvorovs”. Tim apsavīnojūt 1972.g., izaveidōja padūmju saimnīceiba „Cyrma”, kura 1990. g. pōrveidōta par paju sabīdreibu, kas 1998. g. likvidēta.

Pogostā ir ap 40 zemnīku saimnīceibu, kas apstrōdoj gondreiž 700 ha, un ap 350 pīmōjas saimnīceibu, kuru reiceibā ir 2000 ha zemes. Lelōkais uzjāmums ir SIA „Cirmas bekons” Lukjanovkā. Lelōkō jaunlūpu audzētova ir z/s „Rica” Zeļčovā. Z/s „Saulaine” pīdar kūkzōģētova un veikals Tutynūs. SIA „Alviars” Dubinovā pīdar kūkzōģētova. SIA „PASSIM” -- degvīlas uzpiļdes stacija Garbarūs. Veikali atsarūn Tutynūs. Garbarūs ir pansionats „Ludza”.

Vaļsts nūzeimes arheologijas pīmineklis ir Evertovas seņkopi. Evertovas vydslaiku kopsāta (Kopu kolns) ir vītejōs nūzeimes arheologijas pīmineklis.

Latvijas pagasti.1.sēj.-R.: Preses nams,2002.-189.-190. lpp.

Trojanovskis Viktors. Ludzas zeme.-Ludza: Ludzas rajona padome,2004.-108.-116. lpp.

http://images.google.lv/images?hl=lv&q=Cirmas+pagasts&btnG=Mekl%C4%93t+att%C4%93lus

Plašāk Ludzas pilsētas bibliotēkas datu bāzēs